ភ្នំពេញ៖ ប្រធានព្រឹទ្ធសភាសម្ដេចតេជោហ៊ុនសែនបានថ្វាយព្រះពរជូនពរសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងព្រះរាជវរោកាសជយាភិរម្យ នៃព្រះរាជពិធីបុណ្យចម្រើនព្រះជន្មគម្រប់ ៨៨ ព្រះវស្សា យាងចូល ៨៩ ព្រះវស្សា។
សម្ដេចតេជោលើកឡើងថា៖ «សូមព្រះបរមរាជានុញ្ញាតសម្តែងថ្វាយនូវព្រះពរជ័យ សិរីវឌ្ឍនា បវរមហាប្រសើរថ្វាយ ព្រះអង្គទ្រង់ប្រកបដោយព្រះរាជសុខភាពបរិបូរណ៍ ព្រះរាជកាយពលមាំមួន ព្រះជន្មាយុយឺនយូរជាងរយព្រះវស្សា ព្រះបញ្ញាញាណវាងវៃ ដើម្បីទ្រង់គង់ប្រថាប់ ជាម្លប់ត្រជាក់ត្រជុំ និងសេចក្តីសុខក្សេមក្សាន្តដល់ប្រជានុរាស្ត្រគ្រប់រូបជានិរន្តិតរៀងទៅ សូមសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គបានប្រកបដោយព្រះបរមសុខគ្រប់ប្រការ និងព្រះជន្មាយុយឺនយូរ»។
សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ ទ្រង់ព្រះរាជសម្ភពនៅថ្ងៃទី១៨ ខែមិថុនា ឆ្នាំ១៩៣៦ ជាបុត្រីលោក ហ្សង់ ហ្វ្រង់ស្វ័រ អ៊ីហ្សហ្ស៊ី និងលោកចៅឃុន ប៉ុម ពាង។ សម្តេចព្រះមហាក្សត្រីបានរៀបអភិសេកជាព្រះស្នំ ព្រះនរោត្តមសីហនុនៅឆ្នាំ១៩៥២ និងបានក្លាយជាព្រះមហេសីផ្លូវការនៅឆ្នាំ១៩៦៨៕
